"سرگوشی” کی شاعرہ تسنیم کوثر کا انٹرویو

"سرگوشی” کی شاعرہ تسنیم کوثر کا انٹرویو

تفکر – آپ کا پورا نام؟

تسنیم کوثر۔۔تسنیم کوثر

تفکر – قلمی نام؟

تسنیم کوثر۔۔تسنیم کوثر

تفکر – کہاں اور کب پیدا ہوئے؟

تسنیم کوثر۔۔ساہیوال۔18فروری

تفکر -تعلیمی قابلیت؟

تسنیم کوثر۔۔ایم اے اردو،ایم فل جاری
تفکر – ابتدائی تعلیم کہاں سے حاصل کی؟

تسنیم کوثر۔۔جونئیر ماڈل سکول اوکاڑہ سے پرائمری گورنمنٹ گرلز ہائی سکول اوکاڑہ سے میٹرک،گورنمنٹ کالج اوکاڑہ سے ایف اے

تفکر – اعلٰی تعلیم کہاں سے حاصل کی؟

تسنیم کوثر۔۔بی اے ایم اے پرائویٹ شادی کے بعد اب علامہ اقبال اوپن یونیورسٹی سے ایم۔فل جاری ہے

تفکر -پیشہ؟ 

تسنیم کوثر۔۔کام،کام اور بس کام

تفکر –ادبی سفر کاآغاز کب ہوا؟

تسنیم کوثر۔۔لکھنے کا آغاز تو بہت پہلے ہو گیا تھا سکول کے زمانے سے روز نامہ مشرق میں نظمیں شائع ہوئیں پہلی نظم اپنے دونوں چھوٹے بھائیوں کے لیے لکھی۔چالیس سال بعد بھی وہ تحریر میرے پاس موجود ہے۔شاعری کی ابتدا نظم گوئی سے ہوئی تعلیم و تربیت ،نونہال بچوں کی دنیا نےاس شوق کو مہمیز کیا۔سکول میں بزم ادب نے اس شوق کو اور ہوا دی۔کالج میں غزل آشنائی نے اپنا اسیر کر لیا شادی کے بعد بہت سے شوق کہیں گم ہو گئے۔شاعری بھی کسی کو نے میں جا چھپی مگر گم نہیں ہوئی حالانکہ سسرال بہت علمی ادبی گھرانہ تھا۔گھر میں ماہر القادری،اختر شیرانی اور دیگر شعراء کی محفلیں سجتی تھیں مگر ایک بہو بیٹی کی کیا مجال کہ وہ شاعری کر سکے اور اگر کر لے تو منظر عام پہ بھی آئے

تفکر – آپ نظم یا غزل میں کس سے متاثر ہوئے؟

تسنیم کوثر۔۔نظم میں ن۔م۔ راشد،مجید امجد اور فیض سے متاثر ہوں اچھی نظمیں اپنے سحر میں جکڑ لیتی ہیں۔غزل میں آج بھی میر تقی میر کی اسیر ہوں ویسے آتش،مومن،میر درد کی دل کوچھو لینے والی شاعری بھی پسند ہے۔آج بھی اچھی نظم اور غزل دونوں متاثر کرتی ہیں

تفکر -کسی شاعر یا ادیب کا تلمذ اختیار کیا؟

تسنیم کوثر۔۔بہت سا وقت دبے پاؤں گزر گیا جب حالات موافق ہوئے تو محشر زیدی صاحب سے رہنمائی لی مگر طبیعت کے تضاد کی وجہ سے یہ ساتھ نہ چل سکا

تفکر – ادب کی کون سی صنف زیادہ پسند ہے؟

تسنیم کوثر۔۔نظم و نثر

تفکر -ادب کی کس صنف میں زیادہ کام کیا؟

تسنیم کوثر۔۔دونوں میں

تفکر -شعری تصانیف کی تعداد اور نام؟

تسنیم کوثر۔۔”سرگوشی”شاعری کا مجموعہ

تفکر -نثری تصانیف کی تعداد اور نام؟

تسنیم کوثر۔۔”کہانی ان دنوں کی” سفر نامہ
"جہان رحمت برستی ہے” سفر نامہ
"چبھن افسانوی” مجموعہ

تفکر – اپنے خاندان کے حوالے سے کچھ بتائیں؟

تسنیم کوثر۔۔ابا نمبر دار تھے اور امی گھردار خاتون تھیں بہت عمدہ ذوق رکھتی تھیں سب ذوق شوق انہی سے ہم میں آیا۔باقی بہن بھائی پڑھنے کا شوق تو رکھتے ہیں مگر لکھنے کی طرف کسی کا رجحان نہیں

تفکر – ازدواجی حیثیت؟

تسنیم کوثر۔۔شادی شدہ

تفکر – فیملی ممبرز کے بارے میں بتائیے؟

تسنیم کوثر۔۔شوہر،دو بیٹےاور ایک بیٹی

تفکر – آج کل کہاں رہائش پذیر ہیں؟

تسنیم کوثر۔۔حبیب ہومز لاہور

تفکر – بچپن کی کوئی خوبصورت یاد؟

تسنیم کوثر۔۔بچپن بہت ہی خوبصورت،اک سنہری دور جس کا ہر پل چمکتا ہوا دمکتا ہوا،خوب شرارتوں بھرا، پہلی پہلی اولاد تھی خوب ناز نخرے اٹھائے گئے بہت ضدیں منوائی گیئں۔اب تو یادیں ہیں اور پچھتاوے ہیں

تفکر – ادبی سفر کے دوران میں کوئی خوبصورت واقعہ؟

تسنیم کوثر۔۔ادبی سفر تو کئے مگر کوئی خاص واقعہ نہیں

تفکر – ادب میں کن سے متاثر ہیں؟

تسنیم کوثر۔۔۔جن کو پڑھ کے لکھنا سیکھا وہ آج بھی پسند ہیں میر تقی میر،کرشن چندر،پریم چند،غلام عباس،امرتا پریتم،گلزار،ن۔م۔راشد،سارہ شگفتہ،مجید امجد،مصطفی زیدی،محسن نقوی اور بہت سے لوگوں کے بہت سے فن پارے پسند ہیں

تفکر – ادبی رسائل سے وابستگی؟

تسنیم کوثر۔۔اب تو یاد بھی نہیں کب سے اخبار رسائل پڑھ رہی ہوں شاید چوتھی پانچویں کلاس سے بچپن میں تعلیمم وتربیت،نونہال،بچوں کی دنیا پھر حور،زیب النساء،حکایت،سب رنگ اور دیگر علمی ادبی کتابیں اب بھی پڑھنے کا چسکا موجود ہے خود بھی چھپتی رہتی ہوں پاکستان اور انڈیا کے رسائل میں افسانے شاعری اور مضامین شائع ہوتے رہتے ہیں

تفکر – ادبی گروپ بندیوں اور مخالفت کا سامنا ہوا؟

تسنیم کوثر۔۔میں کسی گروہ بندی سے تعلق نہیں رکھتی اپنے کام سے کام رکھتی ہوں کسی کا کندھاا استعمال کرنے کا شوق نہیں کسی دوڑ میں شامل نہیں ہوں کسی کی عنایت کی طلبگار نہیں ہوں محبت کی شاعرہ ہوں۔محبت ہی زندگی کا محور ہے کم آمیز ہوں عزت و وقار کی قائل ہوں۔محبت میں نفع و نقصان کی پرواہ نہیں کرتی۔کسی منصب کسی عہدے سے سے مرعوب نہیں بس عزت اور محبت ہی نصب العین ہے

تفکر – ادب کے حوالے سے حکومتی پالیسی سے مطمئن ہیں؟

تسنیم کوثر۔۔حکومت کی پالیسی سے مطمئن اور وہ بھی ادب کے سلسلے میں ہرگز نہیں۔یہاں پی آر کےے سوا کچھ نہیں۔اندھا بانٹے ریوڑیاں اپنے اپنے کو دے والی مثال ہے یہاں۔چندگنے چنے لوگ اور دیکھےبھالے چہروں کے سوا اور کوئی نہیں ہر طرف یہی نظر آتے ہیں یا پھر وہ جو دھینگا مشتی کر کے اپنی جگہ بنا لیتے ہیں

تفکر – اردو ادب سے وابستہ لوگوں کے لئیے کوئی پیغام؟

تسنیم کوثر۔۔ادب سے وابستہ لوگ بہت با ادب ہیں انہیں کسی پیغام کی ضرورت نہیں سب کی اپنی اپنی دوڑ ہے جو جہاں تک جانا چاہے جا سکتا ہے شہرت کا لپکا شہرت کا نشہ آپ ہی سب راہیں ہموار کر لیتا ہے

تفکر – ہماری اس کاوش پر کچھ کہنا چاہیں گے؟

تسنیم کوثر۔۔تفکر ڈاٹ کام کی اس کاوش کو سراہتی ہوں کہ اس نے ادب میں یہ سلسلہ شروع کر کے سب کو ایک پلیٹ فارم پہ جمع کیا اور اپنی بات کہنے کا موقع فراہم کیا

تفکر – پہچان شعر یا تحریر؟

تسنیم کوثر۔۔کچھ اشعار

ہم لوگ تیرے شہر میں خوشبو کی طرح ہیں
محسوس تو ہوتے ہیں دکھائی نہیں دیتے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آلائشوں سے پاک فضا کو ترس گئے
اپنے ہی گھر میں تازہ ہوا کو ترس گئے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
معیار اپنا ہم نے گرایا نہیں کبھی
جو گر گیا نظر سے وہ بھایا نہیں کبھی
حرص و ہوا کو ہم نے بنایا نہیں شعار
اور اعتبار اپنا گنوایا نہیں کبھی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
دئیے کو دل لگی مہنگی پڑے گی
ہوا سے دوستی مہنگی پڑے گی
مخالف پر بھروسہ کر لیا ہے
اسے یہ سادگی مہنگی پڑے گی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اک تمنا کی تھی دل نے ساتھ تم ہر پل رہو
اس تمنا کی جو پائی تھیں سزائیں یاد ہیں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آسماں کے آنچل سے ٹوٹے جو ستارے ہیں
تم سے کیا کہیں جاناں خواب۔وہ ہمارے ہیں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تم ساتھ نہ دے پاؤ گے یہ ہم کو خبر ہے
ہم پھر بی وفاؤں کا بھرم رکھے ہوئے ہیں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
دل کی ہٹ دھرمی نے طوفان اٹھا رکھا ہے
نا سمجھ اب بھی وہی ساتھ پرانا چاہے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
رستہ بھی کوئی ہم کو سجھائی نہیں دیتا

اور دل بھی ہمیں رہنمائی نہیں دیتا
طوفان امڈ آتے ہیں ہر سمت یکایک
چاہت کو تو دریا۔بھی رسائی نہیں دیتا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تلخیء وقت سے گھبرا کے بلاتے کس کو
یوں تو دنیا تھی مگر کوئی ہمارا کب تھا

جواب چھوڑیں