نواب بہادر یار جنگ سید علی حیدر نظم طباطبائی متفرق…

نواب بہادر یار جنگ سید علی حیدر نظم طباطبائی
متفرق اشعار
……..
اپنی دنیا تو بنا لی تھی ریاکاروں نے
مل گیا خلد بھی اللہ کو پھسلانے سے
…..
اسیری میں بہار آئی ہے فریاد و فغاں کر لیں
نفس کو خوں فشاں کر لیں قفس کو بوستاں کر لیں
…..
بچھڑ کے تجھ سے مجھے ہے امید ملنے کی
سنا ہے روح کو آنا ہے پھر بدن کی طرف
…….
درد دل سے عشق کے بے پردگی ہوتی نہیں
اک چمک اٹھتی ہے لیکن روشنی ہوتی نہیں
…..
دل اس طرح ہوائے محبت میں جل گیا
بھڑکی کہیں نہ آگ نہ اٹھا دھواں کہیں
….
جو اہل دل ہیں الگ ہیں وہ اہل ظاہر سے
نہ میں ہوں شیخ کی جانب نہ برہمن کی طرف
……..
کعبہ و بت خانہ عارف کی نظر سے دیکھیے
خواب دونوں ایک ہی ہیں فرق ہے تعبیر میں
…….
کیا ہے اس نے ہر اک سے وصال کا وعدہ
اس اشتیاق میں مرنا ضروری ہوتا ہے
……
لوٹتے رہتے ہیں مجھ پر چاہنے والوں کے دل
ورنہ یوں پوشاک تیری ملگجی ہوتی نہیں
…..
مری باتوں میں کیا معلوم کب سوئے وہ کب جاگے
سرے سے اس لیے کہنی پڑی پھر داستاں مجھ کو
……..
نشہ میں سوجھتی ہے مجھے دور دور کی
ندی وہ سامنے ہے شراب طہور کی
………
نظر کہیں نہیں اب آتے حضرت ناصح
سنا ہے گھر میں کسی مہ لقا کے بیٹھ گئے
……
روز سیہ میں ساتھ کوئی دے تو جانئے
جب تک فروغ شمع ہے پروانہ ساتھ ہے
……
سحر کو اٹھتے ہیں وہ دیکھ کر کف رنگیں
اب آئنے پہ بھی سکے حنا کے بیٹھ گئے
…….
تو نے تو اپنے در سے مجھ کو اٹھا دیا ہے
پرچھائیں پھر رہی ہے میری اسی گلی میں
……..
اڑ کے جاتی ہے مری خاک ادھر گاہ ادھر
کچھ پتا دے نہ گئی عمر گریزاں اپنا
……
اڑائی خاک جس صحرا میں تیرے واسطے میں نے
تھکا ماندہ ملا ان منزلوں میں آسماں مجھ کو
…..
یہ دل کی بے قراری خاک ہو کر بھی نہ جائے گی
سناتی ہے لب ساحل سے یہ ریگ رواں مجھ کو
…..
یوں میں سیدھا گیا وحشت میں بیاباں کی طرف
ہاتھ جس طرح سے آتا ہے گریباں کی طرف


جواب چھوڑیں